學科懶人包 - 劍橋自然科學 vs 牛津化學

Oscar Chong
5天前
讀畢需時 4 分鐘

喺牛津同劍橋讀自然科學都有唔少分別。劍橋嘅自然科學 (Natural Sciences) 係大類收生 (broad-based)，當中再分為生物組 Biological stream 或者物理組 Physical stream。同學無論係想專修邊個範疇，都要先報讀 Natural Sciences 嘅其中一組，然後每年選修三至四個課程。而牛津就係按個別科目收生，有 Physics、Chemistry、Biochemistry、Biology 等等嘅課程可以報讀。

喺牛津讀化學嘅同學由 Year 1 開始所有 courses 都同 Chem 有關，或者係一啲用嚟輔助讀 Chem 嘅數理知識，所以比較合適一啲肯定自己想主修 Chem 嘅同學。而劍橋自然科學嘅同學如果想讀 Chem, 就可以先喺 Year 1 揀 Chem 做四科選修單元裏面嘅其中一科，但係唔可以只讀Chem。而喺 Year 2 嘅三個選修科裏面，最多可以揀兩科讀 Chem, 第三科就可以配搭生物化學 Biochemistry、材料科學 Material Science、數學 Maths 等等。去到 Year 3 先會揀定主修 Chem, 所以比較合適一啲未肯定自己想主修咩科，但有興趣探索唔同範疇嘅同學。

牛津嘅化學需要要讀四年，畢業可以直接攞到碩士學位 (Master)。而劍橋自然科學一般為期三年，三年後畢業就會拎到學士學位 (Bachelor’s Degree)，某幾個主修科有提供第四年課程 4th Year Course，同學可以選擇報讀 4th Year，完成後亦可以攞到相關嘅碩士資歷。

工作量

以下概括咗劍橋自然科學同埋牛津化學每星期大概嘅工作量。每星期大概嘅工作量。值得留意嘅係，呢兩科分別喺劍橋同牛津都被譽為最忙嘅學科之一，所以同學都要做好心理準備未必有好多空閒時間。

劍橋自然科學

Lectures: 一周平均12小時，早上9點起，星期一至六
Lab: 一周9-12小時
Supervisions: 一周3-4小時

牛津化學

Lectures: 一周平均10小時，星期一至五
Lab:一周12小時
Tutorials: 一周3-6小時, 需2周前預習內容

CAREER PROSPECTS

讀 Science 嘅出路都好廣闊，尤其係劍橋自然科學有好多主修科嘅選擇。唔少報讀 Oxbridge Science 科嘅同學都會以科研為目標，例如牛津化學大概有 55% 畢業生都喺科研方面發展或者攻讀更高嘅學歴。喺畢業之後可以讀 Master / PhD，然後喺大學做 lecturer / professor，或者喺創科公司、藥廠等私人機構做科研。而其他同學就各有唔同嘅發展，例如科學期刊編輯 scientific journalism, 諮詢 consultancy, 專利 patent law, 金融 banking, 教育 education 等等。

申請程序

Oxford Chemistry ✅ 面試❌ 能力傾向測試

根據官方網站提供嘅資料，有 73% 嘅申請人獲邀請進行面試，而 23% 最後獲取錄

面試大多數係大學 Year 1 程度嘅內容，一般會有 Physical Chem, Organic Chem, Inorganic Chem 嘅部分

Cambridge Natural Sciences ✅ 面試 ✅ 能力傾向測試 (ESAT)

近年大約有 80% 嘅申請人獲邀請進行面試，大約有 20% 最後獲取錄

喺面試嘅過程中，教授會協助同學去答問題，同學需要跟據教授所俾嘅提示去進行合理嘅推測，最重要嘅係展現自己嘅邏輯思維同思考過程。即使唔清楚點樣解決問題嘅時候，亦願意去嘗試一步步咁拆解問題。就化學而言，牛津嘅面試內容會比較深入，不過劍橋需要另外準備能力測試。劍橋面試除咗有化學之外，亦好大機會涉及物理或生物方面嘅知識。如果同學對化學之外嘅範疇都有一定嘅信心，報讀劍橋就可以俾多啲機會你喺唔同範疇有所發揮；而如果同學對 A level 或者 Year 1 程度嘅化學有比較深入嘅認識，報讀牛津就可能會比較適合。

最低入學成績要求

牛津化學

A-Levels: A*A*A 包括數學及化學

DSE: 數學必修部分及英文 5，3科甲部選修科目達到 5*5*5 , 包括化學5*，M1/M2 視作一科選修科目

科目組合

A-Levels: 數學及化學必修, 再連同一科科學科目或進階數學

DSE: 化學必修，在連同一科科學科目或 M1/2

劍橋自然科學

A-Levels: A*A*A*

DSE: 所有核心科目最低要求 5 , 相關核心科目或會要求5*, 三科選修科目達到 5*5*5

科目組合

每學院有其獨立要求