學科懶人包 - 心理學係讀啲咩？
- Oscar Chong
- 11月13日
- 讀畢需時 3 分鐘
心理學係一個利用科學去研究人類嘅思想模式同埋行為嘅學科。
透過課程，同學會學到數據分析以及統計學，同埋深入了解心理學唔同嘅分支，包括developmental（發展）、social（社會）、clinical（臨床）、cognitive（認知）同埋forensic psychology（法醫心理學）等。心理學利用唔同領域嘅知識，加上數據分析以及統計學，去理解人類嘅思想同埋行為背後嘅機制，從而喺研究角度嘗試得到客觀嘅結論，採用得出嘅結論提升我哋嘅生活質素、效率同埋精神健康。
工作量
心理學嘅工作量視乎每間大學嘅課程設計。以杜倫（Durham）大學為例，心理學嘅工作量唔算大。每個學年只有一次考試，而平均每個學期，同學只需要提交兩至三篇大概2000字嘅長文，所以有好多課餘時間做自己鍾意做嘅嘢，例如投入唔同學會活動同埋去吓鄰近嘅城市。而喺倫敦大學學院（UCL），工作量都算不太大，但除咗平時每學期要交嘅長文之外，學生亦要做唔少同科學研究相關嘅功課，例如寫lab report、學習透過coding做data analysis 或進行poster presentation等。
劍橋（Cambridge） 心理學課程嘅自由度，相對其他大學會比較大，同學可以選擇一啲其他學科嘅課程，包括哲學，政治，自然科學等等。牛津劍橋課程一般都好注重小組教學，同學會有唔少tutorial / supervision嘅時間，由一個教授或者博士學生對住兩至三個同學深入討論一啲大家有興趣嘅題目。工作量方面就比較多essay，平均每個禮拜需要叫一至兩篇，再加一年一至兩份coding 嘅功課，不過 lab report 就相對唔多，當然都關乎同學揀咗專修咩課題啦！
而牛津（Oxford）並冇純心理學科嘅選擇，同學一般可以選擇 ExperimentalPsychology（重點用神經科學的角度了解心理學）、Psychology and Philosophy（心理學與哲學）或 Psychology and Linguistics（心理學與語言學）。
畢業出路
心理學嘅出路好闊，畢業生可以選擇繼續進修碩士甚至博士課程，成為專業心理學家，例如，臨床心理學家（Clinical Psychologist （CP））或教育心理學家（Educational Psychologist）等。如果同學有興趣喺英國進修成為臨床心理學家，就需要就讀相關嘅PhD博士課程。要留意有部分英國大學只會招收本地英國學生，而且整體嘅競爭都相當大，所以有碩士同相關嘅工作經驗（例如喺NHS做助理心理學家assistant psychologist）會有一定優勢。而係香港嘅CP課程則屬於Master碩士程度，即使同學有意回流香港中大/港大就讀，亦要注意呢兩間大學都同樣競爭激烈，每一間大學每年都都只會取錄大概20位學生，所以同學都要有一定心理準備要好好裝備自己，先可以真正成為臨床心理學家呀！
當然，有唔少心理學嘅畢業生都唔會選擇成為臨床心理學家，熱門嘅出路同樣包括研究助理、心理輔導員、成為商業機構顧問 （consultant）、或者從事人力資源同埋市場營銷相關嘅工作！
入學條件
提供心理學課程嘅大學大多數唔需要同學修讀特定嘅主修科，但牛津大學同埋劍橋大學某啲學院要求同學修讀一門或者兩門科學/數學科目。而其他大學，例如UCL，亦需要同學修讀科學/數學嘅其中一科，而修讀其中兩科就更加會有一定嘅優勢。牛津大學要求報讀嘅學生做入學考試 Thinking Skills Assessment （TSA），而劍橋大學某啲書院亦要求報讀嘅學生做入學試同埋提交喺中學寫過嘅文章/功課作參考文件，所以要睇清楚網站上列出嘅要求！
Oxford：英文同數學取得5或以上，而選修科嘅要求為5*55-5*5*5
Cambridge：所有主科中取得5或以上，並喺兩個或以上嘅相關科目（如數學、科學）中取得5*，而選修科嘅最低要求為5*55
UCL：選修科至少取得5*55，英文數學亦都要獲取5
Durham：英文、數學以及兩科選修科中，於其中三科取得555或以上
Bath：兩科選修科至少取得5*、5，數學至少取得5
*請以官方網站資訊為準
留言