學科懶人包 - 經濟學係讀啲咩？
- Oscar Chong
- 11月8日
- 讀畢需時 3 分鐘
問：
喺劍橋同/牛津/倫敦院校讀經濟學有咩唔同？
答：
經濟係一門研究人類點樣喺有限資源下作出選擇嘅學科。中學程度嘅經濟會直接用文字去教你理論，然後要求學生應用喺現實嘅情況。而大學同中學程度係有好大嘅分別，學生需要以數學加文字去解釋唔同嘅理論，對數學嘅要求都頗高。微觀、宏觀、經濟數學同計量經濟學都係每間大學經濟科必讀嘅。
有啲大學嘅經濟科會係一個Bachelor of Art （BA），例如牛劍同杜倫大學，而其他大學多數會係Bachelor of Science （BSc），前者可能喺選修科會多啲以文科為主嘅選擇，而後者就會較少，但係每間大學都有各自嘅不同之處。除此之外，大學亦會開辦一啲經濟跨學科嘅課程，例如Economics and Finance/ Mathematics/Politics等等，亦有啲四年嘅課程會包含一年嘅外地交流或者實習。近年，隨住市場嘅需求越嚟越大，某啲大學更會開設數據科學同編程嘅模組俾同學選擇。例如 Imperial 最近就推出咗 Economics, Finance and Data Science.
問：
比較下牛劍&非牛劍：Oxford 冇純 Economics讀？
答：
劍橋經濟嘅第一年學嘅會比較廣泛，除咗必有嘅微觀經濟學、宏觀經濟學同經濟數學，仲要讀政治同歷史。第二同第三年開始就有多啲自由去專攻自己有興趣嘅範疇，例如有計量經濟學、銀行與金融、國際貿易與發展。
牛津嘅經濟科有別於其他大學，因為佢哋並冇提供純經濟嘅課程，只有「經濟與管理」(E&M）、「歷史與經濟」（H&E）同「哲學、政治與經濟」（PPE）。
E&M嘅第一年會有三個部分，分別係經濟學入門、綜合管理同金融管理。喺往後嘅兩年，同學需要選修至少兩個有關經濟嘅課程，而至少一個要係微觀、宏觀、經濟數學或者經濟歷史。課程相對有彈性，亦比較接近工商管理。
至於H&E，大家見到課程嘅名係以歷史為先，就可以得知呢個課程係比較著重歷史，而經濟為次要。一年級生需要讀四個部分，包括經濟學入門、歐洲與世界歷史、歷史研究法、英國與法國工業化。
問：
牛劍同其他大學有咩分別？
答：
如果以劍橋嘅純經濟學同倫敦比，喺內容上，劍橋嘅最大特色絕對係可以喺第一年接觸到政治同歷史，了解到唔同嘅理論係喺邊段時間萌生同應用喺現實社會。劍橋喺教學上除咗有較多以數學為主嘅Supervision，仲有多啲機會寫Essays。至於牛津同倫敦最大嘅分別就係學科嘅組合，如果同學只係對純經濟有興趣，咁可能就未必需要考慮牛津嘅課程喇！相反，如果同學未諗清楚自己嘅職業取向，咁牛津嘅課程亦可以提供一定彈性俾同學喺唔同範疇中選擇。
問：
讀完經濟學出到嚟做啲咩？
答：
一個最常聽到嘅迷思就係讀經濟同讀工商管理、金融冇咩分別。但其實純經濟嘅課程係完全唔會接觸到呢類嘅內容，所以同學要睇清楚經濟、工商管理同金融嘅分別！讀完經濟科嘅出路都好闊，近年有唔少嘅畢業生都選擇入金融業，做投行、銷售與貿易、計量金融、財富管理等。諮詢、會計、核數、教育、公務員都係一啲好常見嘅行業。亦有啲學生亦會繼續進修，甚至去做學術研究。
留言