UCAS重大改革 — 點樣寫Personal Statement？
- Oscar Chong
- 11小时前
- 讀畢需時 3 分鐘
由2026年入學開始，UCAS嘅Personal Statement將會有重大改動！！！
唔再係最多4000字元嘅長篇文章，而係變成三條獨立問題，覆蓋之前Personal Statement入面最重要嘅內容。每條問題最少要寫350個字元，但總字數仍然唔可以超過4000。
今次改革目的是為咗確保申請人真係提供大學想知道嘅資料。你要寫得更精簡！新格式亦會令大學更容易比較申請人喺某啲特定方面嘅表現，所以你用嘅例子一定要有目的性，同埋要互相呼應，突顯你嘅強項同獨特之處。
問題一：你點解想修讀呢個課程或學科？
你嘅學歷同學習點樣幫助你為呢個課程做好準備？
除咗正規教育之外，你仲做咗啲咩準備？呢啲經歷點解有用？
點樣答問題一：你點解想修讀呢個課程或學科？
佢哋想睇啲咩：
你嘅熱情同知識
點樣同你嘅人生目標有關
你可以寫啲咩：
動機：個人興趣、生活經歷、導師影響
你閱讀過嘅資料或你有興趣嘅理論
對未來嘅計劃，點解呢個學位啱你
小貼士：
試下搵一個你特別有興趣嘅細分範疇（niche），集中描述（特別係申請牛劍時）
點樣答問題二：你嘅學歷同學習點樣幫你為呢個課程做準備？
佢哋想睇啲咩：
你已經有嘅特定或可轉移技能
有證據證明你能夠喺課程中表現出色
你可以寫啲咩：
你喺學校讀書點樣令你有興趣報呢個學科
你學校功課點樣同你想修讀嘅科目有關
有關嘅獎項或成就
唔好提你嘅成績！大學會睇你嘅成績單同考試結果。應該提一啲唔會出現在其他申請部分嘅獎項/經歷。
小貼士：
如果你參加過任何形式嘅額外正規教育（例如大學主辦嘅課程，網上或實體都好），記得要寫
試下將呢部分講嘅內容同問題一入面提過嘅興趣/細分領域拉返埋一齊
點樣答問題三：除咗學術，你仲做咗啲咩準備？點解有用？
佢哋想睇啲咩：
除咗書本知識以外，仲有咩額外努力令你成為一個好嘅候選人（例如課外活動）
一啲個人經歷或責任，幫你建立咗重要嘅技能或性格
你可以寫啲咩：
有關嘅工作經驗或義工活動
課堂以外嘅成就，例如本地比賽
幫你發展出某啲有用性格特質嘅個人經歷，例如堅毅、責任感等，呢啲特質對大學生活都好有幫助
小貼士：
展示你對科目的熱情點樣推動你喺課堂以外都主動學習，例如參加課外活動、自學、非正規機構舉辦嘅課程（例如AAHK）
呢部分係你展示非學術方面強項嘅好機會，例如：抗壓能力、同理心、自我推動力、時間管理能力等等
整體貼士：
唔好用Essay形式去答每條問題！如果真係需要，可以用一句開頭引入你講嘅內容，再用一句作總結。字數有限，每個字都要精準有用。
有啲內容可以應用喺多過一條問題，例如課外活動可以寫喺Q1或者Q3。遇到呢種情況，要諗清楚邊度擺落去會令整個答案更有連貫性。例如：你嘅興趣係因為課外活動開始／加深？定係因為興趣先去參加活動？根據邏輯放喺最啱嘅位。
雖然而家Personal Statement分開咗幾部分，但你都可以整合成一個完整嘅自我形象，記住盡量將各部分連接起來。
質素比數量重要！如果要喺深入描述一個重要活動對你嘅影響，或者簡單列出所有經歷之間二選一，請選擇前者。
相信自己，唔洗太緊張！你一定得！
留言