學科懶人包—土地經濟係讀啲咩?
- Oscar Chong
- 11小时前
- 讀畢需時 2 分鐘
學科簡介
土地經濟學係一個涵蓋法律、經濟同環境嘅學科，一年級生要讀嘅科目就橫跨咗法律、可持續發展、數學、統計學同經濟。同學亦會學到同政策分析相關嘅理論，所以係好闊同靈活嘅一科。同學可以透過課程透徹咁理解到同環境、經濟相關嘅政策及議題，當中包括房屋短缺、環保税收等。課程亦會講解社會可以點樣透過經濟同法律，推動一啲同可持續發展以及環保相關嘅政策㗎！
一般課業負擔
而同劍橋其他科目相比，土地經濟嘅工作量唔算太大，平均每個禮拜都會交一至兩篇大約1500字嘅長文，而各科嘅supervision（小組輔導班，類似香港嘅tutorial）每兩個禮拜先有一次，所以都會夠時間做吓自己鍾意做嘅嘢！另外，由於土地經濟學涵蓋咗部分法律學嘅知識，有少部分同學會選擇喺完成第一年課程後申請轉讀法律系（但轉系絕對唔容易㗎）！
就業前景
因為土地經濟呢科橫跨咗多個領域，所以一般學生通常會有好唔同嘅職業出路，由金融、投資銀行、顧問公司到持續發展分析同政策顧問都係熱門嘅出路。
最低入學要求
報讀土地經濟並唔需要特定主修科（不過有修讀數學同經濟會有幫助），亦唔需要做入學考試，不過有近半嘅書院會要求報讀嘅學生提交喺中學寫過嘅文章/功課作參考交文，所以要睇清楚網站上列出嘅要求！
HKDSE要求:
喺所有主科之中取得5或以上，並喺兩個或以上嘅相關科目之中取得5*。選修科嘅最低要求為5* 5 5。書院之間訂立嘅收生要求可以好唔同，同學有機會被要求喺個別科目（例如數學同經濟）考獲5**。
留言