學科懶人包—生物醫學科學係讀啲咩?

Oscar Chong
12小时前
讀畢需時 2 分鐘

學科簡介

生物醫學科學（Biomedical Science，又名 medical bioscience）係一門研究人類鍵康嘅理學學士（BSc）學科，學習包括實驗室技術、病理學、免疫學、神經科學、解剖學、公共衛生、藥理學等等。不同大學有佢嘅特別之處，例如倫敦國王學院（King's College London KCL）會係神經科學方面出名啲。但係各間大學嘅科程內容大致上都係year 1係要讀一次所有生物醫學科學嘅大學課程單元（modules）先，然後year 2之後先開始分科，揀自己有興趣嘅單元，深入咁讀其中一個方向。部份大學，例如牛津，除咗平時嘅三年制學士學位，仲會有讀四年制碩士學位嘅選擇。

基本上，生物醫學科學會同醫科嘅內容有重疊，只係減去臨床嘅部分。讀書嘅工作量上，一般想再報醫科或其他健康科學嘅學生係需要努力啲，要爭取有First honours嘅成績。

生物科學同生物醫藥科學有咩分別？

冇錯佢哋係有分別㗎。生物醫藥科學著重於研究人類鍵康，主要範疇有生理學、腫瘤學和免疫學。相反，生物科學著重於更廣義嘅生物學上，主要範疇有動物和植物細胞嘅分子生物學，甚至係環境保護。一般嚟講，想再報醫科或其他健康科學嘅學生係建議選讀生物醫藥科學嘅，因為所學嘅內容會同醫科或其他健康科學更相似。

就業前景

讀完生物醫藥科學嘅人，通常會選擇繼續進修去讀碩士或做研究、或者做實驗室技術員、又或者再次報考醫科、牙科、物理治療、職業治療等健康科學學科。其他出路包括係製藥公司返工、做初創企業、喺法律監管部門返工等。

第二個學位

因為UCAS系統上的5個選項中，學生只可以填4間醫學院，所以有好多申請醫科嘅學生會將生物醫藥科學放係UCAS作為佢哋嘅非醫科選擇（non-medic option) 。

入咗大學之後如果仲想再報醫科，學生可以選擇係year 1（用中學成績報）同埋 year3（用大學成績報）。喺香港同英國嘅醫學院，通常學生要爭取有first honours嘅成績（雖然網站上會寫second-upper係最低要求）先會有足夠嘅競爭力報到醫科，仲要加上能力傾向測試如 GAMSAT、UCAT、BMAT（由2024-2025大學申請年度開始取消）嘅好成績，先可以報到醫科。而香港嘅醫學院歷年來都只係會收一啲大學國際排名比較高嘅學生。